У суботу, 25 чэрвеня, пайшла з жыцця педагог, рэдактар, грамадская дзяячка Аляўціна Вячорка. Пра гэта паведаміў у Facebook яе ўнук, палітык Франак Вячорка.
Пахаванне, па словах Франака, адбудзецца ў аўторак, 28 чэрвеня.
Аляўціна Вячорка нарадзілася ў 1936 годзе. Атрымаўшы адукацыю філолага, выкладчыка беларускай і рускай моў, спачатку яна працавала школьнай настаўніцай у Брэсце, піша «Радыё Свабода». Пасля стала працаваць у Мінску літаратурным рэдактарам. Рэдагавала пераклады класікаў замежнай літаратуры на беларускую мову, дзіцячыя кнігі Анатоля Клышкі, матэрыялы сесій парламента. Таксама Аляўціна Вячорка актыўна ўдзельнічала ў грамадска-культурным жыцці, дапамагала Таварыству беларускай мовы, беларускім газетам.
Сын Аляўціны, Вінцук (Валянцін) Вячорка, адзін са стваральнікаў Беларускага народнага фронту і экс-старшыня Партыі БНФ (1999−2007), як і маці, філолаг — вядомы мовазнаўца і папулярызатар беларускай мовы. А яе ўнук, дарадца Святланы Ціханоўскай Франак Вячорка, атрымаў журналісцкую адукацыю.